കേരള കെട്ടിട നികുതി ആക്ട് 1975 പ്രകാരം 1973 ഏപ്രിൽ 1-ാം തീയതിയോ അതിനു ശേഷമോ നി൪മ്മാണം പൂ൪ത്തിയാക്കിയ എല്ലാ കെട്ടിടങ്ങൾക്കും ഒറ്റത്തവണ കെട്ടിട നികുതി ബാധകമാണ്. എന്നാൽ 01.04.1997 നോ അതിന് ശേഷമോ പണി കഴിപ്പിച്ചതും 278.7 സ്‌ക്വയർ മീറ്ററോ അതിൽ കൂടുതലോ ഏരിയ വരുന്നതുമായ വാസഗൃഹങ്ങൾക്ക് വർഷം ഒറ്റത്തവണ കെട്ടിട നികുതിക്ക് പുറമെ ആഡംബര നികുതി ഒടുക്കേണ്ടതാണ് .

കെട്ടിട നികുതി, ആഡംബര നികുതി എന്നിവ നിർദിഷ്ട തീയതിക്കകം അടയ്ക്കാത്ത പക്ഷം വീഴ്ച വരുത്തുന്ന തീയതി മുതൽ പ്രതിവർഷം 6% പലിശ അടയ്‌ക്കേണ്ടതാണ്.

(ഈ ഉത്തരവിന് 01.04.2020 മുതൽ പ്രാബല്യം ഉണ്ടായിരിക്കും)

സംസ്ഥാനത്തിൻെറ റവന്യൂ വരവിനങ്ങളിൽ പ്രധാന പങ്കു വഹിക്കുന്ന നികുതിയാണ് തോട്ട നികുതി. തെങ്ങ്, കവുങ്ങ്, റബ്ബ൪, കാപ്പി, തേയില, ഏലം, കുരുമുളക് എന്നിവ ഒറ്റയ്ക്കോ കൂട്ടായോ കൃഷി ചെയ്യാൻ ഉപയോഗിക്കാൻ 2 ഹെക്ടറിൽ കൂടുതൽ ഉള്ള സ്ഥലത്തിനാണ് തോട്ടനികുതി ഈടാക്കുന്നത്.

നികുതിയിനത്തിലോ ഇതര ഇനങ്ങളിലോ സ൪ക്കാരിലേക്ക് അടയ്ക്കാനുള്ള തുക യഥാസമയം ഒടുക്കുന്നതിൽ വീഴ്ച വരുത്തിയാൽ, അത് കുടിശ്ശികയായി കണക്കാക്കി, കുടിശ്ശികയായ തീയതി മുതലുള്ള പലിശ സഹിതം ഈടാക്കുന്നതിന് 1968-ലെ കേരള റവന്യൂ റിക്കവറി നിയമവും അതിൻമേലുള്ള ചട്ടങ്ങളും സ൪ക്കാരിന് അധികാരം നൽകുന്നു.